На ден 19.05.2026 година, во Државниот завод за ревизија, Главниот државен ревизор м-р Максим Ацевски и Заменик главниот државен ревизор м-р Орхан Адеми со своите соработници одржаа работна средба со Претседателот на Европскиот суд на ревизори г. Тони Марфи и г. Питер Борсос, аташе од канцеларијата на претседателот.
Главниот државен ревизор м-р Максим Ацевски изразувајќи задоволство од посетата на Претседателот на Европскиот суд на ревизори, кој е за прв пат во официјална посета на Државниот завод за ревизија, го запозна со активностите и постигнатите резултати на ДЗР како врховна ревизорска институција во државата.
Претседателот на Европскиот суд на ревизори, г. Тони Марфи, изрази задоволство од презентираните активности и резултати на Државниот завод за ревизија, притоа потенцирајќи дека Државниот завод за ревизија е сериозна врховна ревизорска институција која изминатите 15 години овозможила стажирање во Европскиот суд на ревизори за повеќе од 20 државни ревизори.
Во рамки на билатералната посета, главниот државен ревизор м-р Максим Ацевски и Претседателот на Европскиот суд на ревизори г. Тони Марфи остварија работна средба и со Претседателот на Собранието г. Африм Гаши на која ги дискутираа досегашните заеднички како и планираните идни активности во повеќе области.
Овие иницијативи се клучни за унапредување на капацитетите за ревизија во контекст на Планот за раст на Западен Балкан и Реформската Агенда. Дополнително, ќе ги поддржат активностите во рамките на Мрежата на ВРИ за земјите кандидати и потенцијалните кандидати за членство во ЕУ. Посетата претставува важен чекор кон зајакнување на соработката и подобрување на ефикасноста во управувањето со средствата од ЕУ, со цел постигнување на одржлив развој во регионот.
