На ден 25.09.2024 година, делегација на Европскиот суд за ревизори предводена од д-р Лаима Луција Андрикиене, член на Европскиот суд на ревизори, го посети Државниот завод за ревизија, каде што оствари работна средба со Главниот државен ревизор м-р Максим Ацевски и Заменик главниот државен ревизор м-р Орхан Адеми со своите соработници.
На работната средба на која во фокус беше Планот за раст на Западен Балкан и очекуваните придобивки од неговата имплементација во процесот на евроинтеграција на регионот и конкретно на нашата земја присуствуваa и г. Томас Макевициус и г. Пјетро Пуричела од Европскиот суд на ревизори, како и заменик евроамбасадорот на делегацијата на ЕУ во државата, г. Бен Нупнау.
Главниот државен ревизор м-р Максим Ацевски заблагодарувајќи се на посетата и интересот на делегацијата на Европскиот суд за ревизори во Државниот завод за ревизија, ги презентираше резултатите и активностите на ДЗР, како и клучните утврдени состојби во спроведените ревизии од областа на користењето на средствата од ЕУ фондовите и нивниот степен на искористеност во државата.
Соговорниците изразија подготвеност во следниот период да бидат преземени дополнителни активности за продлабочување и интензивирање на соработката помеѓу Државниот завод за ревизија и Европскиот суд за ревизори во професионалниот развој и едукација на вработените и зголемување на вештините и знаењата во повеќе области.
