Денес, во просториите на Државниот завод за ревизија, Главниот државен ревизор м-р Максим Ацевски оствари работна средба со Постојаниот претставник на Програмата за развој на Обединетите Нации (УНДП) во Република Северна Македонија, Армен Григорјан и раководителот на секторот за демократско владеење, Билјана Цветановска Гугоска.
На одржаниот состанок, Главниот државен ревизор и Постојаниот претставник на Програмата за развој на Обединетите Нации во државата, дискутираа за актуелни теми и спроведување на идни заеднички активности. Активностите се насочени во делот на зајакнување на капацитетите на ревизорите за спроведување на ревизии на финансиски извештаи изготвени на пресметковна основа, ревизии за Вредноста на парите (Value for money), ревизии за Целите на одржлив развој, како и за спроведување на ревизии на единиците на локалната самоуправа.
Постојаниот претставник на Програмата за развој на Обединетите Нации изрази задоволство од презентираните активности од работата на ДЗР како врховна ревизорска институција, при што предложи почести состаноци помеѓу претставници на УНДП и ДЗР во насока на реализирање на заедничките активности преку официјализирање на соработката со потпишување на Меморандум за соработка.
Главниот државен ревизор се заблагодари на досегашната поддршка која Државниот завод за ревизија ја добива од Програмата за развој на Обединетите Нации во државата (УНДП) како сериозен партнер, притоа изразувајќи надеж дека соработката како успешна приказна ќе продолжи и ќе се продлабочува и во иднина.
