Државниот завод за ревизија, претставуван од главниот државен ревизор м-р Максим Ацевски, зеде активно учество на првиот состанок на советодавното тело за процесот на креирање на Инвестициската мапа. Овој проект претставува нова фаза од Националната развојна стратегија (2024-2044) и се реализира со поддршка на Програмата за развој на Обединетите нации (УНДП).
Формулирањето на Инвестициската мапа е од клучно значење за идентификација на приоритетните сектори и можностите за инвестирање, во согласност со целите за одржлив развој и стратегиските приоритети на земјата. Инвестициската мапа ќе ги опфати следните шест стратешки области:
- Одржлива, иновативна и конкурентна економија
- Одржлив локален и регионален развој кој обезбедува кохезија
- Демографска ревитализација и социјален и културен развој
- Владеење на правото и добро управување
- Сигурно, безбедно и отпорно општество
- Зелена трансформација
Проектот има за цел да овозможи подобро следење на инвестициите и остварување на целите на Националната развојна стратегија, со фокус на одржливоста и долгорочниот развој на државата.
Преку оваа иницијатива, ќе се создаде појасна слика за клучните сектори кои ќе ја водат државата кон одржлив раст и развој. Учеството на Државниот завод за ревизија во овој процес е од витално значење, бидејќи институцијата ќе обезбеди стручна ревизорска поддршка за следење на реализацијата на овие значајни проекти.