Во просториите на Државниот завод за ревизија, Главниот државен ревизор м-р Максим Ацевски оствари работна средба со Генералниот секретар на Владата на Република Северна Македонија, г. Игор Јанушев.
На работната средба, Главниот државен ревизор и Генералниот секретар на Владата разговараа на повеќе теми и области поврзани со предизвиците во управувањето со јавните финансии, и воедно дискутираа и за дел од утврдените клучни состојби во објавените конечни ревизорски извештаи кои изминатиот период предизвикаа големо медиумско внимание и се од интерес на државата.
Генералниот секретар на Владата ја потенцираше клучната улога на Државниот завод за ревизија во јавниот сектор, притоа потенцирајќи дека ДЗР како Врховна ревизорска институција во државата е исклучително важна институција имајќи ја предвид големата експертиза, професионалност и квалитет во вршењето на државната ревизија.
Двајцата соговорници изразија отвореност и подготвеност за продлабочување на комуникацијата и соработката, со цел подобро и поодговорно управувањето со јавните средства, зголемување на довербата на граѓаните во ефикасноста на системот и начинот на користење на средствата на даночните обврзници, донесувањето на новиот Закон за државната ревизија и разгледување на конечните ревизорски извештаи во рамките на работните тела при Владата.
