На ден 17.03.2022 година, главниот државен ревизор м-р Максим Ацевски и заменик главниот државен ревизор м-р Орхан Адеми, учествуваa на онлајн состанок на шефовите на врховните ревизорски институции на земји-кандидати и потенцијални кандидати за членство во Европската Унија, настан кој се одржа во Париз, Франција во организација на СИГМА.
На состанокот, шефовите на врховните ревизорски институции од мрежата имаа можност да дискутираат и преку презентирање на состојбите да разменат мислења и искуства во врска со справувањето со пандемијата предизвикана од вирусот COVID-19, активностите и предизвиците со кои се соочуваат институциите, како и за планирањето на идните стратешки приоритети во насока на остварување на конкретните цели.
Во својата презентација и обраќање, главниот државен ревизор м-р Максим Ацевски ги презентираше активностите и подобрените комуникациски практики на Државниот завод за ревизија, кои придонесуваат за веќе видливи резултати и значително зголемена транспарентност, отчетност и видливост на Државниот завод за ревизија.
Истовремено, главниот државен ревизор истакна дека очекува во следниот период да биде продлабочена соработката помеѓу врховните ревизорски институции од мрежата, овозможување на поголема размена на искуства и знаења, спроведување на паралелни ревизии, соодветно вреднување на постигнатите резултати на секоја врховна ревизорска институција, како и промена на методологијата за оценување на работењето.