Денеска, на 27.06.2024 година, во просториите на Државниот завод за ревизија, новоизбраниот министер за финансии, г-ѓа Гордана Димитриеска-Кочоска, оствари работна средба со главниот државен ревизор, г. Максим Ацевски.
Прашањата поврзани со предизвиците во управувањето со јавните финансии, потребата од зголемена транспарентност и отчетност во управувањето со јавните средства и значајната улога на Државниот завод за ревизија во насока на зајакнување на институционалните капацитети и создавање на ефикасно контролно опкружување и заштита на јавните средства, беа предмет на дискусија на денешната работна средба.
Главниот државен ревизор, г. Ацевски ја поздрави иницијативата на министерката Димитриеска-Кочоска и изрази подготвеност за понатамошна соработка и поддршка. Истовремено, беше потенцирана важноста за донесување на новиот Закон за државна ревизија, со кој се зајакнува финансиската и оперативната независност на Државниот завод за ревизија, а воедно обезбедува и можност за постапување по препораките од ревизијата и разгледување на ревизорските извештаи од страна на Собранието.
Оваа активност претставува одговор на барањата од Европската унија и Меѓународните стандарди за државна ревизија (ISSAI), - истакна Главниот државен ревизор.
Оваа средба е само една од многуте активности кои се во насока на унапредување на улогата на државната ревизија кое е од клучно значење за остварување на поставените реформски цели во финансискиот сектор – додаде Димитриеска-Кочоска.
Двајцата соговорници изразија отвореност и заложба за поинтензивна соработка, со цел за подобро и поодговорно управувањето со јавните средства и зголемување на довербата на граѓаните во ефикасноста на системот и начинот на користење на средствата на даночните обврзници.
