Sot, më 30 shtator 2025, në hapësirat e Entit Shtetëror të Revizionit u mbajt punëtori e dedikuar për forcimin e bashkëpunimit ndërmjet Entit Shtetëror të Revizionit dhe Prokurorisë Publike.
Punëtorinë e hapën Kryerevizori Shtetëror, mr. Maksim Acevski dhe Prokurori Publik i Republikës së Maqedonisë së Veriut, Ljupço Kocevski. Në fjalimet e tyre, ata theksuan rëndësinë e koordinimit institucional në proceset e kontrollit dhe veprimit ndaj parregullsive të konstatuara, duke theksuar se partneriteti ndërmjet institucioneve të revizionit dhe të prokurorisë përbën mekanizëm kyç për mbrojtjen e interesit publik, luftën kundër korrupsionit dhe sigurimin e llogaridhënies dhe integritetit në përdorimin e mjeteve publike.
Vëmendje e veçantë iu kushtua rolit dhe rezultateve të qendrave hetimore në prokurorinë publike, të cilat si njësi të specializuara, kontribuojnë në një koordinim më efikas dhe zbatim të procedurave hetimore. Puna e tyre ka një rëndësi të veçantë në mbledhjen dhe analizimin e të dhënave, mbështetjen e prokurorëve gjatë udhëheqjes së hetimeve dhe forcimin e bashkëpunimit institucional, veçanërisht në rastet që lidhen me krimin financiar dhe praktikat korruptive.
Në kuadër të punëtorisë u shqyrtua edhe zbatimi i Memorandumit të Bashkëpunimit ndërmjet Entit Shtetëror të Revizionit dhe Prokurorisë Publike, i cili krijon bazë të fortë për veprim të përbashkët dhe veprim më efikas sipas raporteve të revizionit, me qëllim llogaridhënie dhe mbrojtje më të madh të interesit publik.
Gjithashtu, u organizuan sesione të veçanta pune për veprimin lidhur me raportet përfundimtare të revizionit, ku u ndanë përvoja dhe sfida praktike me qëllim përmirësimin e proceseve të ardhshme dhe rritjen e efektivitetit të mekanizmave institucionalë.
Në fund të punëtorisë u miratuan përfundime dhe u përcaktuan aktivitete të ardhshme të orientuara drejt thellimit të bashkëpunimit, ndërtimit të një qasjeje të përbashkët dhe arritjes së efikasitetit më të madh në mbrojtjen e resurseve publike.
